Statuts dil Forum cultural Tujetsch
Statuts Forum cultural Tujetsch
I. Determinaziuns generalas
Num e sedia
Artechel 1:
Sut il num „Forum cultural Tujetsch“ vegn ei fundau in‘ uniun cun la sedia en Tujetsch. L‘ uniun ei confessiunalmein e politicamein neutrala.
Intent
Artechel 2:
L‘ uniun ha igl intent primar da promover tuttas spartas e stentas culturalas en vischnaunca.
Las activitads san cumpigliar las suandontas tematicas:
– Tgira dil lungatg romontsch (dialect da Tujetsch, cuors, bibliotecas, seras litteraras, prelecziuns, documentaziuns, ediziuns dad ovras, reclamas, etc.)
– Historia locala (historia, architectura, geologia, fatscha dil vitg, documentaziun davart Tujetsch, )
– Cant e music
– Exposiziuns e producziuns (fotografias, teater, art, film, dias, hobbys, referats, presentaziuns, )
– Isonzas e folclora (museum local, usits, )
– Lavurs manualas (filar, teisser, formar, entagliar )
– Restauraziuns, sanaziuns e manteniment (fuorns, tegias d’alp, parts da vias veglias, casas e baghetgs, cussegliaziun da privats etc.)
– Excursiuns culturhistoricas ( cavar fier, caltschina, baselgias e capluttas, historia en general, nums locals, fauna e flora, geografia, geologia etc.)
– Natira (cuntrada, botanica, collecziuns, manteniment da bellezias ed atgnadads dalla natira, ) Entras publicaziuns egl organ ufficial empruar da promover in bien spért per ils fatgs culturals, sensibilisar il pievel e tgirar nies reh scazi cultural tuatschin.
II. Commembradi
Commembers/ras
Artechel 3:
Commembers/ras activs/as
Commember/ra activ/a sa mintga persuna naturala e giuridica daventar che ha interess pils fatgs culturals dalla vischnaunca da Tujetsch.
Artechel 4:
Commembers/ras passivs/as
Commembers/ras passivs/as ein persunas naturalas e giuridicas che sustegnan l’uniun finanzialmein. Els han negin dretg da vuschar ed ein era buca eligibels.
III. Organisaziun
Organs
Artechel 5:
Ils organs dalla uniun ein:
– la radunonza generala
– la suprastonza
– il revisur da quen
La radunonza
Artechel 6:
La radunonza generala ei il pli ault organ dall’uniun. Ella vegn convocada dalla suprastonza ni dad 1/5 dils commembers cun dretg da vuschar. La convocaziun sto vegnir fatga sil pli tard diesch dis avon termin cun indicaziun dallas tractandas.
Ella vegn tenida mintga dus onns e s’occupescha da suandontas fatschentas:
a) Elecziun dalla suprastonza e dil revisur da quen per il cuoz da dus onns.
b) Ella approbescha il protocol, il rapport annual, il quen annual da mintga onn, il preventiv ed il program da lavur
c) Ella fixescha la contribuziun annuala
d) Revisiun dallas statutas
Decisiuns vegnan pridas cugl absolut pli dallas vuschs dils votants. Tier elecziuns vala medemamein igl absolut pli.
La suprastonza
Artechel 7:
La suprastonza secumpona da treis commembers. Ella seconstituescha sesezza e secumpona dil president, cassier ed actuar. La suprastonza liquidescha las fatschentas currentas. Il president representa l‘ uniun e tgamuna las radunonzas e sedutas.
Igl actuar substituescha il president e scriva ils protocols dallas radunonzas e sesidas. Il cassier meina il quen ed incassescha las contribuziuns.
Il revisur
Artechel 8:
Il revisur da quen reveda il quen annual e la facultad dall’uniun e dat rapport a scret leusura per mauns dalla radunonza generala.
IV. Finanziaziun
Contribuziuns
Artechel 9:
Ils commembers/ras activs/as pagan ina contribuziun annuala fixada dalla radunonza generala. Ilscommembers/ras passivs/as e donaturs sustegnan l‘ uniun cun ina contribuziun libra.
V. Determinaziuns finalas
Midadas
Artechel 10:
Ina revisiun parziala ni totala dallas statutas sa vegnir fatga sin proposta dalla suprastonza ni dad 1/5 dilscommembers. Per quei intent drova ei 2/3 dallas vuschs dils presents.
Soluziun
La soluziun dalla uniun sa mo la radunonza generala cun 2/3 dils commembers decider. Ina eventuala facultad duei vegnir impundida en favur dalla cultura en Tujetsch.
Vigur
Artechel 11:
Quellas statutas vegnan messas en vigur cun la fundaziun dil Forum cultural Tujetsch, ils 16 da matg 1997.
Tujetsch, ils 16 da matg 1997
Il president: Igl actuar
André Schmid Bruno Berther
Revisiun
Igl artechel 6 ei vegnius revedius a caschun dalla radunonza generala dils 6 da fevrer 2026.
Tujetsch, ils 6 da fevrer 2026
Il president: Igl actuar:
André Schmid Tarcisi Hendry
