Tuor da Putnengia
Informaziun – sclariment  – precisaziun
Dapi igl onn 2002 persequitescha il Forum cultural Tujetsch l’erecziun d’ina fuorma da tuor da lenn ellas miraglias dallas ruinas dil casti da Putnengia, antruras in edifeci nobel dils signurs de Putnengia. Las autoritads communalas vulan accentuar e festivar era en Tujetsch ils 600 onns Ligia Grischa. Ord quei motiv han els surpriu ord mauns dil Forum cultural Tujetsch la mira d’ina erecziun d’ina tuor da lenn, d’ina vart in segn historic, da l’autra vart ina purschida turistic-culturala e tuor panoramica. Da niev ei vegniu planisau la tschunavla versiun d’ina tuor. La finanziaziun duei succeder cun agid da benefacturs, sponsurs ed instituziuns. La planisaziun e l’erecziun resta en mauns dalla suprastonza communala. Cun l’erecziun digl Archiv cultural Tujetsch fuss ei als responsabels dil Forum cultural Tujetsch buca stau pusseivel da tgirar duas plazzas da baghegiar. Ord vesta ch’il recaltgar las finanzas sefa pli levamein per in’uniun, han ils responsabels da vischnaunca dumandau il Forum cultural Tujetsch per quei sustegn e duvrar nossa uniun per quei intent. Bugen vein nus dau suatientscha, persequitein nus sco uniun gia varga 20 onns in tal project.

La radunonza da vischnaunca dils 6 da december 2023 ha renviau il project dalla tuor da protecziun a Putnengia. La suprastonza communala haveva planisau da dar al Forum cultural Tujetsch ina contribuziun unica da frs. 585’000.00 ed el medem mument reducir quella summa en l’altezia dallas donaziuns per quei project da frs. 385’000.00 per igl onn 2024 e frs. 200’000.00 per igl onn 2025.

Per precisar:
La tuor da lenn vegn eregida per quei mument che la finanziaziun ei garantida cumpleinamein. Il project vegn realisaus senza in transfer da finanzas davart dalla vischnaunca. La lubientscha da baghegiar vegn publicada en quella Tuatschina, cun risguard da buca periclitar la lubientscha da baghegiar per quei project davart dil cantun. Entginas donaziuns pil project ein gia vegnidas fatgas.

Forum cultural Tujetsch e suprastonza communala Tujetsch