Nossaistorgia.ch
Venderdis, 22 da november 2019, han rtr ed il Forum cultural Tujetsch envidau alla presentaziun dalla plattafuorma nossaistorgia.ch. Ver 70 persunas han visitau l’occurrenza en Sala Cristalla a Sedrun.
La plattafuorma nossaistoria presenta fotos, films, documents dil cantun Grischun e vegn tgirada dad rtr. Rodund 4000 documents da different gener ein gia accessibels per mintgin. Tujetsch ei representaus cun 756 documents ord igl Archiv cultural Tujetsch. La plattafuorma stat a disposiziun per mintgin che vul sez emplenir quella cun da ses documents.André Schmid, il president dil forum cultural Tujetsch beneventa cun grond plascher la sala pleina e quei in suentermiezdi allas duas. El presenta e beneventa Flavio Huonder, il responsabel da nossaistorgia tier rtr. Pil Forum cultural Tujetsch seigi la plattafuorma ina grondiusa pusseivladad da mussar la diversitad dalla cultura tuatschina, punctuescha il president. Il giavisch ei era quel, che biars Tuatschins nezegien era quella pusseivladad cun era publicar sin nossaistorgia.ch ni surdar agl archiv cultural.
Flavio Huonder meina ils presents tras la pagina d’internet nossaistorgia.ch. L’entschatta dat el cun il film da nies scribent Vic Hendry digl onn 1986. La schelta da fotos da Tujetsch gia publicadas muossa la cuntrada tuatschin atras tuttas stagiuns ed el decuors da plirs decennis. Autras fotos muossan la cultura d’antruras, co nos antenats luvravan, co els festivavan, cantavan e tgiravan la veta religiusa. Las fotos ein pil pli accumpignadas d’in text informativ. Las persunas ein las pli biaras indicadas cul num, quei che dat veta alla document fotografic. Interess ha naturalmein la fotografia viva, il film, svegliau. Ils dus film: Fiasta da 75 onns dalla Societad da musica Sedrun ed il Fallun da glin a Gonda digl indigen Lucas Berther muossan l’impurtontadad dalla rimnada egl archiv cultural. In’egliada en documents d’autras vischnauncas muossa la diversitad e la valeta culturala da quella plattafuorma pil Grischun.La presentaziun ei vegnida engraziada cun in ferm applaus ed il resun silsuenter ei staus fetg positivs ed ha svegliau da tuttas interessantas discussiuns duront il puschegnet da creflis e caffè.
Ils responsabels dil Forum cultural Tujetsch animeschan ils presents da segidar d’engrondir igl archiv cultural cun documents culturals da tut gener. Leu semantegn la cultura e viva vinavon per nos vegnetsuenter.
La suprastonza dil Forum cultural engrazia pil bi segn da susteniment per quella activitad culturala.
