Ina truasch sin viadi a Rueras
Probabel pli che 200 onns veglia ei la truasch ch’ei vegnida spustada il gliendisdis sera el vitg a Rueras. En siu plaz niev ch’ei buca lunsch naven dil vegl duei ella vegnir mantenida per las proximas generaziuns. Ils possessurs da quei baghetg vegl han regalau el al Forum cultural Tujetsch ch’ei s’interessaus persuenter, suenter ch’igl ei vegniu enconuschent ch’el stoppi untgir ad ina nova ga- rascha. Uss duei la truasch survegnir in niev tetg ed in niev intent. Tgeinin ei aunc buca clar dil tut. (fmr/hh)
Veglia truasch salvada per las proximas generaziuns
Ina veglia truasch el vit
g da Rueras ha in niev plaz. Ella ha stuiu untgir al project per ina garascha nova ed ei vegnida alzada sur via vi sin in’autra parcella. Igl anteriur possessur dil baghetg ed il Forum cultural Tujetsch ein leds e cuntents dall’acziun reussida.
Hans Huonder/FMR
En sesez havess la truasch ella part veglia dil vitg da Rueras giu da vegnir spazzada. Il Forum cultural Tujetsch ei vegnius attents sin quell’intenziun sin fundament dalla damonda da baghegiar. «Nus havein lu contactau immediatamein la vischnaunca ed il possessur, la famiglia da Florian Berther, che ha lu regalau la truasch al forum», di Tarcisi Hendry dil Forum cultural Tujetsch.
Pli che 200 onns veglia
Aschia eis ei reussiu da spindrar il baghetg cun ina vegliadetgna da probablamein pli che 200 onns. Parallelmein ha il forum saviu acquistar ina parcella ella vischinonza per aschia saver dar alla truasch in niev plaz. El rom da quell’entira acziun en favur dil spindrament dalla truasch ei il forum era vegnius sustenius dil vischinadi da Rueras. Il gliendisdis sera ei il baghetg vegnius francaus ed alzaus sur via vi rodund diesch meters sils sochels novs. «Igl ei stau in’acziun perfetga senza cumplicaziuns. Nus havevan schazegiau ina peisa da rodund tschun tonnas e savevan igl emprem secapescha buca, schebein la maschina possi era alzar la truasch. La fin finala ei tut iu tenor plan», di Tarcisi Hendry.
Diever futur ei aunc buca clars
La truasch che vegneva nezegiada pli baul sco deposit da garnezi ha duas alzadas. Ina tiarza alzada construida pli tard, ei vegnida spazzada. Ussa duei il baghetg survegnir in niev tetg da slondas. Per tgei intent ch’ella vegn duvrada igl avegnir sa il forum aunc buca definitivamein. «Nus havein formau ina gruppa da lavur persuenter e vegnin a far nossas ponderaziuns. Igl ei pusseivel ch’ella savess survir igl avegnir sco stizunetta ni sco liug per exposiziuns», di Tarcisi Hendry. Medemamein eis ei aunc buca decidiu, schebein la truasch duei star en possess dil forum ni vegnir surdada al vischinadi da Rueras. La parcella duei ir en possess dalla vischnaunca. «La truasch el liug niev revaletescha il maletg dil vitg da Rueras e mantegn aschia la tempra veglia da quel», puntuescha Tarcisi Hendry.
