Finissascha – cultura da scalins tuatschins

(th) Ils scalins, la pulenta, l’exposiziun, ils films ni l’Uniun Platialas han carmalau la dumengia, ils 25 d’october 2015, numerus visitaders e visitadras el Museum La Truaisch a Sedrun.
Allas duas fuva la sala dil museum gia pleina e tuts spanegiai sin las scenas d’alpicultura ed agricultura da nossa val e regiun. La relaziun tier quella cultura ei gronda e da profundas ragischs. Ils pli passai han viviu entiramein quella veta e seregordan, tgi cun bunas ed auters cun meins bunas regurdientschas. La vegliadetgna promova e beneventa las regurdientschas d’affon e da giuventetgna!

Punct las treis semova il til da scalins, las platialas dalla Uniun Platialas Sumvitg dil vitg enasi viers il museum. Sco sin camond sesvida il museum e la roscha da visitaders serimna avon il museum per guder la melodia sonora da platialas. Las paucas dunnas ed ils umens laian resunar entgins tocs e dattan ina impressiun da lur savida d’ir entuorn cun lur platialas sco cun in orchester d’instruments. Ils tocs fan surstar, fan mirar e ludar il vesiu ed udiu. In um pli passau lai siglir las larmas dil plascher.

Biars fan ussa diever dalla cuschina ed ustria preparada dil Forum cultural Tujetsch. La pulenta cun groma va bein a prau cun l’atmosfera purila. Il star da cumpignia promova la discussiun da caussas daditg vargadas ch’ein mo pli historia dalla val.
El museum sez cuntinua igl admirar las scenas filmadas ed oravontut las persunas che vegnan avon el film. Auters admiran las bellezias naturalas els tschalers dil museum, nossas numerusas mineralias. Ellas treis alzadas dil museum vegn admirau la cultura e historia culturala dalla val. Tiels biars sveglian era cheu certs exponats regurdientschas da pli baul.

In giug d’encurir sveglia il regl d’anflar e sepudend era da gudignar in premi. Aschia ein numerus sin via atras il museum cun in formular ed enqueran ton sco ei pon scalins!

Viers las tschun entscheiva ei a vegnir pli freid, lu cul sulegl sezuppa davos las neblas e l’umbriva dil museum renda pli e pli freid, sesvida il museum ed il contuorn.

Ils responsabels dil museum e dil Forum cultural Tujetsch ein satisfatgs dil di ed ein pli che cuntents ed engrazieivels als numerus visitaders ed allas visitadras da quei suentermiezdi. La cultura ei stada el center ed ha speronza svegliau e sensibilisau il sentiment da ver bunas ragischs culturalas ed ina ferma historia dil vargau.

La sort ha stuiu decider davart ils gudignaders dalla concurrenza d’encurir. Ils ventireivels ein stai cugl emprem premi la Giulia Deragisch da Bugnei, lu Lucia Cadalbert-Cavegn da Rueun ed Anna Soliva da Rueras. Cordiala gratulaziun!

Muort numerusas damondas ed il grond interess restan ils scalins era vinavon exponi duront la sesiun d’unviern. Cun venderdis, ils 30 d’october, ei la sesiun da stad ida a fin. Bugen beneventein nus Vus naven dils 20 da december 2015. Gruppas ein da tut temps beinvegnidas el museum!